الأحد، 14 أكتوبر 2012

شعر شعبي عراقي



الإهداء...
امي عليها السلام  والدي الف ياء الحياة .. اخوتي .. اصدقائي .. 
وطني .. مع الدمع


فيديو كليب قصيدة سر الحب 
 

http://b.top4top.net/m_132uizo1.mp3
تم التسجيل في استوديوهات حاتم العراقي / دبي
هندسة صوتية : عبود زيادة / تقاسيم كلارينت : Husnu Senlendrici 

E-mail :
dhrgamaliraqi@gmail.com
القناة الرسمية 
https://www.youtube.com/user/dhrgamaliraqi/videos

 
 قصـــــ شعر ـــــــــ شعبي  ــــــائد 
تداعيات وطن

رايد وطن من صدگ ... بس كون الگه الصدگ
حتى انه اريدن وطن

ورايد شعب مو شعب  ...  ياكل ويشرب فقط
رايد شعب ينتفض لو مر عجاف الزمن

ورايد بعد وشكثر ... احلام من الزغر
كل يوم يطلع شمر وليـهسه متحققن

والمـاأريده نعم ... راح انه اگوله بألم
والصوت هو القلم والورقه اسمع اذاً :

مااريد بابي تدگ .. تحرجني ما عندي
ومااريد عالارصفه الگه الصبح ولدي
ومااريد اعبر جسر والگه مره اتجدي
ومااريد ابن الوطن يحلم لِبس جندي

ومااريد فارس چذب  مليت من الچذب
عبرن عليه گبل بس هسه ما عبرن

ولاتبچي ما اقتنع  خبره صرت بالدمع
مكسور عدنه ظلع  ويگلي لا عثرن

وعندي بعد بس طلب ... عاجل لكل العرب!
اذكر عباره أمس ... ظلت تحز بالنفس

" القاهره تكتب وبيروت تطبع  وبغداد تقرء "

ما تكتب القاهره وبيروت ما تطبع  لا احنه مو فقره
بغداد تكتب بعد ...
بغداد تطبع بعد ...
وكل الشعب يقره وكل العرب تقره
كل العرب تقره ...
محطة اخيرة
عشگ عراقي

بَرِد تموز حبك من يمر صيف وحر تشرين  يانار اشتياقي

وراقي ما شفت بس انت والله
والغيرك چِذب من گال راقي

وكافر بالعشگ ماعندي الايمان بس بعدك نعم صار اعتناقي

واحساسي نبي من راد يهواك
كسّر كل هُبل قبل التلاقي!؟

يا شعري وقضيتي والمكاتيب ياسهر الليالي واحتراقي

الك كل العمر ومقصر وياك
يا بيتي و محلتي وكل زقاقي

وعليك العين تعمه لو غبت يوم ويحالي شلون لو طال الفراقي

لا تبعد عَلي ياسلوة الروح
وعهدي اوياك اسمعه واتفاقي

على هذه الگلب كثره اليمرّون وعيونك فقط بس انت باقي

وصحيح انت حلو وهواي عشاگ
لكن يختلف عشگ العراقي
صدّگ يختلف عشگ العراقي

ويبقى الحلم كالصدى
صـــوت و حلم

حاير تظل لشوكت
            وعني تظل ابعيد
وبس بالحلم نلتقي
             وگلي الحلم شيفيد
                            اني ادري مامقتنع وتذوب مثل الشمع
اتريد يمي تجي ونفس الوقت مـتريد
وصح تختلف من تحب
             ويّاك ما يختلف
      لكنه گلبي طفل شي قنعه يوم العيد

واعرف جوابك بعد
          كلمة حبيبي انتظر
     والهذه ما اسألك نفس النعيده انزيد
وارجع حضن صفنتي
         واغفه اعله صوت الدمع
              ورسمك يمرني غصب چن احنه أيد بـأيد
واصحه وسراب الجرف
        وغرگان شوگ الگلب
              ولو فاض نهر العمر جيتك بعد شتفيد؟
اختار صبري وطن
       واجبر كسرخاطري
               والسان شاعر سطر
                 وجمهوره انت يحس وايريد منه ايعيد
حاير تظل لشوكت
                      وعني تظل ابعيد
وعني تظل ابعيد ..


متى السؤال يجد الجواب
ليش؟

عله انقاض الدمع
رممنه الخدود
وواعدنه الضحك بس ما لگانه

ماندري الفرح بس لهل القصور
لذلك يعتذر مامر واجانه

وما ندري السبب
لو بينه لو بيك
وضّح يا زمن وبكل امانه

مسجون الصدگ گدام العيون
والچذاّب شو طالق عنانه

يعني احــنه غلط چه فقره والعوز!
مثل ظلنه صفه يركض ورانه

لو يمكن قــــــدر نرهم عالاحزان
وصاغنه الدمع حد ما عمانه

ومن فضلك بعد نحتاج تبرير
ليش الطيبه محسوبه مهانه ؟!

نلزم سيف حتى انصير وياك ؟؟
ونعوف الورد غافي بمكانه

ونلغيهه المشاعر والاحاسيس
واذا فز الضمير انسد اذانه !؟

ومانحچي بعد مثل التماثيل
ويخون البشر گلبه ابلسنه

عذابك يازمن بس گول لي وين
تعبانين من يوم اللفانه

ونسأل يا هلي ليش المعانات
في قاموسكم توجد خيانه ؟!

من عدكم عرفنه
الطيبه والخير
چاليش الزمن قاسي معانه ؟؟

نرجع للدمـــــــع ونبيع الانقاض
وكالعاده الحزن صفقه اشترانه

وشكراً للدمـــــع بس هو وفـّـاي
شريف ومانكر اصله ونسانه  



الحاجه ام الاختراع                   
أبو محتاج!

محتاج مثلك (علي)  مااريدن اهل الفيل
ومحتاج تمطر علم  مو تمطر ابسجيل
ومن فكرت يا شعب 
 مستقبلك بي تعب
 عقلي ويه گلبي لعب  
حرب ودمار وقتل وشلون يطلع جيل؟!

محتاج واهس طفل  وتگول طفل الصين ؟
لو حل من المدرسه  مايركض اعله الطين !
ومن زغره واعي وفكر  واخلاق عنده ودين
ولوجاع يقره اكتاب
 لويسمع الزرياب
ويسأل منو السياب لامو منو استالين

محتاج طيبة گلب  مزروعه بين الناس
وياريت كل البشر  مافاقدة الاحساس
واتمنه اشوف الورد  ينشم ولا ينداس
وترد سوالف امس
  حب ومحنه وهمس
وتطلع علينه الشمس وچف الصدگ ينباس

محتاج صاحب اخوا بس كون الي محتاج
مااريده كلّش نبي  ولااريده  هم حجاج
ولوصار مرّه ملك
  افرح يصير الملك
لكن يهم بالشعب لامو يهم بالتاج

ثاريني عايش حلم  ومن واقعي منهزم
وضحكوا علي للعلم  وطلقوا عليه اسم
سموّني ابو محتاج .. من كثر ما محتاج



لا اعرف من الاروع انت ام من احب ؟
شكتبلك بعد

شكتبلك بعد مو خلصت الچلمات
                  وياشاعر يداين خاطر اكتبلك؟
وماعندي صور وارسملك الابيات
                  يا احله الصور مجنون وارسملك
حسنك مشكله تيّه على الاوزان
                 زاحف كل حرف بس كون يوصلّك
واذاشاطىء غرامك صايرالنه ابحور
                ابحورالشعر خجلانه شدگـّلك
ظلّك قافيه يلمشيتك بالحان
               وزرياب اعتزل لو شاف بس ظلّك
يا قمة ترف يا وحدة الموضوع
              يا نقطة ضعف بس انت عد خِلّك
ممكن رقتك تصلح قصيدة شوگ
              بس ديوان حب لو تنوصف كلّك
ارجع للصفر عالفطره شعري تريد؟
              ارحم حال شاعر صار من اجلك
عن كل شي اكتبت بس لا تظن مغرور
              لكن حضرتك معذور شوصفلك
يالوصفك لغز ومحـير الاوراق
           واقلام الشعر ماممكن اتحلّك!
شاعر يعتذر من عندك اني اليوم
           كل هذا الذكرته لاتظن جـلّك
ومن بعد اعتذاري اهديك هذه البيت
           لكن مو وصف لا حتى مااخذلك
عدهم كل شمس تفصل نهار وليل
            بس عندي الشمس تشتاگ تنـزلّك!
واذا عندي الشمس تنـزل لأن تشتاگ
             چا يعني الگمر ينـزل يحب رجلّك
                           ينـزل يحب رجلك

بأسم القلب والروح
مــــــاتجينه

هامت الروح بغيابك  سرحت باليل المدينه

ومن سألني الشوگ عنّك مانفع وياه حجينه
ماتجينه ..
لاتظن ننسه ونذكرك لا بعد لا ما نسينه

يادمع منهوالينشفك مو شتاگة حتى ادينه

ويا عشگ لـ غنية السبعين كل الحانه بينه

ويا سهر ذيج الليالي ياگلبنه وياحنينه

يا شعر عالفطره انت بيك من اول بدينـه
ماتجينه ..
خاطري مكسور خاطر جاب كل عمره وسنينه

وياعمر من غير شخصك مظلمه ايامه وحزينه

وغيركم مايمله عيني چان حبينه وهوينه

بس الك عالن رجائي غيركم متوسيلينه

ما يحن معقوله گلبك خاف يمكن باع دينه

لويحسدك گول حقك؟! لوعذر منّك رضينه
ماتجينه ...
ما نريدك دوم يمنه بالچذب سيّر علينه

نبقه يعني شلون فكرك نبقه نحلم ما تجينه
ابقه واحلم ما تجينه
ماتجينه



الى الانسان فقط وحصرياً *استفتاءات                    
الحريّة

تحچي بكيفك .. تمشي بكيفك
اتحب كل شي .. تكره كل شي
تسمع كل شي .. ترفض كل شي
بس فكّر لو رايد تضحك .. بعد الضحكه يمكن تبچي!..

الحرية
مثل الفرصه .. هي اتريدك تبحث عنهه
بس تلگاهه .. ياويلك منهه .. لا لاتظنهه
هم موجوده عند الغير..
ومثل الطير .. ويمكن
ماكو شارع لكن .. احذر تمشي عكس السير!.. وتحلم بيهه ..
ولو دگـّت بابك تانيهه ..
بابك عينك ... عينك بابك
من اتفز لا ما تلگيهه 
الحرية
لو رايد تعرف هم ناسك ..
غـامر حتى في احساسك
تربح مرّه .. تخسر مرّه
بس الغايه تقـنع راسك !

الحرية
فكره وورقه .. يمكن ترقه .. يمكن تبقه
بس بالك لا تصبح طلقه ..
بس بالك لا تصبح طلقه .. الحرية


عتب  اعتذار  حب
ســـاكت


ساكت ياوطن  والحرگَه تاكل بيك
لو خايف بعد والسكته من خوفك

من حرب الحرب  جبنه العمر وياك
من اكل الجثث ما ينترس جوفك

ومابيك الذنب گول الذنب چا وين
يمكن نعتذر لو نفهم اظروفك

چنت المدرسه  وبيك الشعب طلاب
وبس دگ الجرس شو فارغه اصفوفك

تقبل ياوطن؟  يرضيك هذا الحال
ناسك للأسف تتراكض اتعوفك

وتقبل ياوطن؟ شبّانك الحلوين
تتغرب غصب تحرمهه من شوفك

جاوب لا تظل  ساكت يـبو الثورات
عشرينك بعدهه اتعيش بطيوفك

من طور الحزن  ملينه ما ملّيت
چاطور الفرح ما تعزف ادفوفك

منريد الفرح  بس كون اريدك سيف
موعيب بغمده اتنامهه اسيوفك
وبايگ ما صرت  ما خاف من جلاد
مو هذا شعارك هذه معزوفك

چاشنهو التغير؟  يا عراق شبيك
ثار حسين ذمه بشيبة ازلوفك


وشعبك من عطش  رادك مثل عباس
يعني حسين شعبك وارضه اله اطفوفك

لكن للأسف ماكوا مثل عباس
ومانوصل عشر ياحسين لحروفك

ونعتب ياوطن  من حبنه الك والله
شفناك النهر عطشان بجروفك

ومن انصحك لأن  صدگنه كلنه اخطاء
يا بيت الكرم نتسمّه بضيوفك

اصفن ويه نفسك  راح تعرف زين
لو ما تنتفض چاضاع معروفك

عذراً يا وطن  بس ثور حتى نثور 
لو تگضي العمر والقيد بچفوفك

تنويه : مانقصدوطن  يعني الوطن بالذات 
     بعيون البشر هم موطن انشوفك

احياناً يكون معي القلم والورقة ولكن
الصورة  رؤيا من جانب اخر

محتار بيدي القلم والحسره بيه تلوع
وافكار عنده شكثر بالي والف موضوع
شكتب سألني القلم والورقه تشكي الجوع
ماجاوبت واسكتت چان الجواب ادموع

مرّات اكتب شعر  من غير ورقه وقلم
                          ومرّات الگه الدمع تفعيله وزن ونغم!
والعين صاغت بحر والفكره هي الألم
                          صورة عندي اذاً والحيره صارت عدم

مااريد بعد القلم والورق خلهه تروح
ومادام عندي الدمع تفرح تريد الروح
والمن بعد وافتخر كافي فخر يـجروح
شاعر صرت للأسف بس الفخر للنوح
بس الفخر للنوح


على طريقتي
مااحبك

مااحبّك چذب
والله ذايب بيك
بس دوّر عليه بيك تلگاني
واذا هذه الاگوله
 تظن ابالغ بيه
 تگدرتنسحب بس صعبه تنساني
وماگلّك چذب
 گبلك صدگ حبيت
 بس يوم العرفتك صار شي ثاني
وتخيّل طفل يعرف يظم اسرار
 تلگه البلگلب يركض على اللساني
احبّك
كلمه ماتروي بعد للروح
 لأن مرّت گبل قاموس وجداني
ومتهمني حروف الكلمه من تنگـّال
بس همني الفعل شتحسه شيعاني
 
لأن اني من احب تدري اختلف بالشوگ
 وماگلّك طبع بس هذه عنواني
وما گلـّك ملاك
 وبس حچي يفلان 
دگ تلگه بصدگ مصبوغه بيباني
احبّك
كلمه گالوهه گبل عشّاگ 
و بيهه ماأهم وتركهه بس اني
عندي لهفه لك شايلهه من سنين 
و احبّك كلمه لا ما تطفي نيراني
لا ما تطفي نيراني ..




الأرضـــــ!
اقطاعي هذا الوكت  ..  وفلاح بيه العمر
يزرعني آه ودمع .. وبالتالي اخضر شيب
ومايخجل ويستحي .. جَدّيت منه فرح
جاوبني اسكت عيب !
ومديت خلگي امل .. كل ظنتي يتـعض
جاهل طلع للاسف
وماعندي علم الغيب
وناديت صوتي رجع .. ماواحد اليستمع
مهجور كل الحقل .. ماباقي حتى الطير
وفزاعه صار العقل .. وافكار بي تحتضر
وبالخوف نام الجسد
وللغير صافي الخير
ومحصولي بيدر حزن .. والسوگ مامستقر
غبشه نزل باعني .. مامرّه صوت ابيش
اقطاعي هذا الوكت
من باگ حتى العمر واسأل ردت عالسبب .. محّد يگلي ليش
وينه اليگلي ليش ؟؟


وطـن ... لـن و لم
معــــــذور

ارسملك فرح
وبعيني الدمعات
وهمومي صفت ترسم معاناتي

وضحكلك چذب بس داخلي مجروح
وبس حالي علم ماحال مأساتي

وصفناتي شكثر
مابيهه قط احلول
وخدّي يشتهي يشتاگ صفناتي !!!

واسراري بحر بس ما لگت سفـّان
حلفت بس الي تنطق بطولاتي

ممكن بالعشگ ويّاك صح ارتاح
لكن في وهم مجملهه راحاتي

مشكلتي الگلب
حزنه اعله كل شي يصير
وهمومه جبل وسفوحه حسراتي

وساكت للأسف
بس چان عندي اللسان !!؟
ومن كثر الظلم ضاعت عباراتي

لاتعتب بعد ياحبنه ..واترجاك
عيش وياي بالحلوات مُرّاتي

واضربلك مثل ..لا مو مثل تشبيه !؟
وبهذه صدگ حاسب حساباتي

معذور الحزن نتشابه انه وياه !
ما عنده وطن … سكنته باهاتي
سؤال: ماعنده وطن ؟ جواب: يبقه بلا وطن !
أبقه بلا وطن .. شكراً تحياتي


شمس وگمر

ابعين اشوفك شمس وابعين اشوفك گمر
وباقي وتظل مبتداء رادوك تصبح خبر
مجروح واعرف نعم لكنهه نقطه ابحر
ياقمه غير السفح معروفه عند النظر

ومعروف طبع الجبل متهزه قطعاً ريح
ومذلول يبقه السفح يتحمل التجريح
موعيب من تنجرح لا عيب من طيح
بس بيهه يوجد فرق يحتاج بس توضيح؟

يعراگ لمنّ طحت گاع احنه وانت المطر
ابعين اشوفك شمس وابعين اشوفك گمر
 


استطيع ان اكتب لك كل يوم قصيدة ... لكن لا استطيع ان اكتب لك كل القصائد في يوم ... 
لأنني كل يوم اجدك اجمل !!!
التوقيع
ضــــمير الحب

يا كل شي بحياتي
            يا حلم دنياي
            يا دمعة فرحتي بضحكة احزاني
يالحبك خرج
        عن طابع المألوف
        من گد ما يحبك غار مني اني!
وعن هاي البشر
            واضح فوارق بيك
           عنهم تختلف من قاس ميزاني
وانواع شكثر
         من العشگ تعنيك
         حب من نظره الاولى ومن طرف ثاني
ولو ناسي بعد         
   ذكرني اترجاك
            حتىّ يعتذرلك حتى وجداني
وما گلك عشگتك
          لا ولا أهواك
          ذايب بيك دور راح تلگاني
وما اگلك حلو
          ياعاطفي وشفاف
          بس صدّگ حبيبي والله تسواني
وشاعر من صرت
             وانت سبب في هاى
             صايرلي بحر كل فكره بوزاني
يا اسمي الثلاثي
           واللقب وياه
           يعني انت هويتي للّيقراني
وما اجامل لأن
            يشهد عليه الله
            بس راي الگلب تلگاه على الساني
ما شايف شمس
          تطلع عليه ابليل
         ولا شايف گمر من غبشه صحاني!
يعني انت :
      الوصف والوصفه
                والموصوف
                ما يحتاج وانت القاصي والداني
وتباً للعشگ
      تاريخه لو ينساك
      يا بلقيس بس بعين قباني
 واتمنه العمر
         ما يعبر العشرين ؟!
         ولا باچر يجي وتگول ينساني
بس خاين أسف؟
            تالي طلعت وياك
            طيفك من يمر سهران يلگاني
ياحب اعتقد :
       تملك ضمير انسان
       وثق لو ما ضميرك باقي ومعاني

لالاتـِـرد؟
لا لا ترد... خليني ذابحني البعد
واشتاگ لكن للأسف شوگي مثل صوتي يرد
لا لا ترد...
خليني وحدي انه احترگ
مابين چذبك والصدگ ضاعت لهفتي والعشگ
وحالي مثل حال النخل مذبوح بس ينـزف عثگ
واذكر چنت لمن تجي واخجل چنت من الحچي
ومكسور خاطر ما ترد ..
لا لا ترد... طلعن مكاتيبك چذب ...
بس الصدگ منك طلع انك صدگ لا ماترد
واحتار وحدي بحيرتي ... وبدمعتي ... وبغربتي
غربة وطن ما منسعد ..
لا لا ترد... خليني ذابحني البعد
لا لا ترد .. لا ترد

 لاتسأل زمن مجنون
خربت!

خربت من شفت جنحان عند الفيل  ومن شفت النوارس صارت ذيابه

وخربت من شفت مره الأسد مرعوب  خايف ما طلع بالليل للغابه!

         مجنون الزمن لو عقلي انه المجنون  هذا الشفته من هو اليعرف اسبابه؟

وجبت ايدي غصب گتلهه فركي العين بلكي مو صدگ وينچ يا سبّابه!

              تالي اتيقنت موبس حلم لا طيف  واقع حال بس ظنوني مرتابه؟

شفت الناس بعض الناس .. غير الناس شفت الناس نفس الشفته بالغابه

واحد من يهد ويهد گبل بالسيف  عاف السيف هسه وينخه بگرابه

واحد مقتنع يوسف كلاه الذيب  وتگله چذب وايگول لا يابه !!!

واحد ما دره ما يعرف الي صار  شاهد راح لمن صارت اطلابه

واحد ينسأل تعرفهه بت فلان  جاوبهم چذب ويگول حبابه

واحد چان واحد هسه صار اثنان  لأن وجهين عنده وغاش اصحابه

أو .. واحد .. أو .. واحد ..أو .. واحد ..

والاضرب بعد سألوا طفل بالعيد  شتحب تشتري شنجيب لـعّابه؟

دبابه صرخ يلعب حرب وايريد  ميعيّد اذا ماعنده دبابه !

وطفل ثاني شرد يذرع شوارع گام  ويكره للأسف مدرسته وكتابه
وطفل ثالث .. وطفل رابع .. وطفل خامس ..

واخيراً ..

 مجنون الزمن فعلاً طلع دولاب  وبكيفه يفر لو راد دولابه




الزعل

اذا زعلان گلّي حته اراضيك
بس صعبه اليحب يزعل على روحه

واذا قصدك عتب وتگول ناسيك
هم شايف بشر يتبره من روحه

انت اتعيش بيه شلون امر بيك
لا تسأل بعد عالجيه والروحه

على باب العشگ تذكر واتانيك
وتتأخر عَلي دمعاتي مفضوحه

ومثل حال الطفل حالى من الاگيك
اشوف الدنيا عيد وانت مرجوحه

هسه تريد تزعل يعني اخليك
لو مو بس عذر لو جايب اطروحه


صاحب صاحبك

لوحه دنيتك بيهه العقل رسام
                    جَربـه يم صحيحه لا تلاونهه

واحذرمن ضحك في وجهه الك كل يوم
                    ضحكات البشر تخفي معادنهه

وشمسك بالشته مو تختلف بالصيف
                    واذا هايه الحقيقه يله قارنهه

تلگه عالأرض صح ناس بس ميتين
                    واحياء شكثر مدفونه باطنهه

ومثل طبع البحر تلگاهه كومه اسرار
                    بس وينه اليفسّر في مكامنهه

عصفور بقفص لا تقبل ايخلوك
                    واحچيه الصراحه ليش ساجنهه

صاحب صاحبك بس حَاسبه كل ساع
                    واذا منّك زعل ياصحبه ضامنهه

من حَبّك صدگ يندل تره الخدين
                   لا داعي بعد توصف مفاتنهه

والرادك عمر يتحملك يومين
                جَنه وبيهه بس رَضوان خازنهه

ولتبيع الصدگ لو مشتري چذاب
                طيورك من تحن تذكر مواطنهه

وزرع بس ورد لا تزرع الصفصاف
                ياطيّب گلب خيرك محاسنهه

وكمّل لوحتك حب وحنان وطيب
                موناليزه من يگَدر يثـــّمنّهه ؟؟
                      من يگدر يثـــّمنّهه



غداً

غصبن عالحزن!

تگضي وداعتك وسوالف تصير  وباچر يا وطن يرجع فرحنه
موعدنه المهم لو متنه وانعيش  بس انت المهم كل احنه صحنه
وما ننغش بعد علمنه الدروس  صح قاسي الزمن لكن نصحنه
علمنه نعرف الزين والشين   ياهو الطيب وياهو الجرحنه
وما نغلط بعد ونصير حيطان  واحد يكتب وثاني مسحنه
وما نقبل ابد نصبح توابيت  حصتنه الدمع صافي ربحنه
وقطعاً ياوطن عايش بالگلوب  يعني اگبالنه وين احنه رحنه
ولد الملحه گلي شلون ننساك  غزر بينه ياموطن ملحنه
ويامحنه التجي تلگانه الچفوف  ذبحنه الميم صارت النه حنّه!؟
وذبحنه المستحيل وكلمة شلون  بس حبّك فقط هو الذبحنه
ونزرع بالأمل حتىّ يحصدون  عدنه اطفالنه باچر فلحنه
ويطلعلك فجر من اريدك تحير  وليلك ينجلي والله بصبحنه
وترجع ياوطن من احله الاوطان  وغصبن عالحزن يرجع فرحنه



الى :
مغتربة
صدكَيني چذب والله ما مرتاح
لأن نفس الألم البيچ بيّه

صح انتي بغرب واني بشرق مجبور بس همومنه عاشن سويّه

يجمعنه الحزن وانگون كاالاخوان
ويفرقنه الفرح مثل المنيّه

ومو وحدچ غلط دوريني ضايع بيچ لأن ابداخلي ضعتي عليّه

واحس احنه البعض مرّات مخلوقين
وبهذا حِكم رب البريه

لكن نختلف في راي بس معقول وقطعاً ما فسد للود قضيه
اذا دمعچ نزل عالخد توالي الليل
انه دموعي تصب من المسيّه !




اختلاف الحب قد يفسد للقلب قضية

للعشگ قــــانون


ما مرتاح طبعاً والحچي مايفيد  وبعد ما ظل صبر كافي الصبرته

بالحب تختلف مااختلف وياك  بس عوّض گلب مني الاخذته

مليت انتظر باچر تجي وما جاي  عگب باچر اجه وما جيت انته !؟

واسهر والسهر ريشه ابمهب الريح  واحس حتى الگمر عاتبني سكته

وگلي اشحصلت من عمري ذاك الفات  اذا نص العمر لجلك سهرته

واذا بيه الذنب فهمني خل ارتاح  واذا بيك الذنب رغماً قبلته

يحسدونه شكثر حسبونه عالعشاگ  ويگلولي شكثر من عدنه بگته

وگتلهم چذب بس بالأسم محبوب  ومتندم على يوم العرفَته

لأن طبع اليحب معروف عند الناس  صافن والحچي كله ابصفنته

وانت لا تحن لا مثلي هم تشتاگ  وقانون العشگ وحدك عزفته

موهيچ اليحب گلب اليحب ولهان  ولا گلب اليحب هم هيچ دگته

كل ساعه احترگ طافيني دمع العين  وترجع حضرتك ثاني وشعلته

ومثل عالم صرت بس تخترع الاعذار  ولعلمك نعم هسه افتهمته

بستانك حزن منه جنيت اهموم  ماجاني الفرح لايوم ضگته

كافي بطلت رجعلي گلبي انوب  مااريد العشگ ماعندي بخته

وباچر لا تجي ودّگ على الباب  مفتاحك لأن اصلاً كسرته

وتتندم عَلي تحلم تردلي بيوم  وخط رجعه چذب سولفهه نكته

وازيدك بالشعر بيتين مو بس بيت  البومك للصور بيدي حرگته

ورسمك لو طفل والعين امه اتصير  من عيني بعد صدگ فطمته !!!

وخسران اعترف والحب تجاره صار  وبايع مشتري كل شي خسرته

بس ابقه القلم وانته الورق جوّاي    وبكيفي الاريده والشطبته


النهر والناعور وانا نشتاق 
بستان الحبايب


عاشگ بس عشگ مثل المجانين وماگلكم عليهه بس تعرفوهه
ومدمن حيل حبهه صارلي اسنين واذا ادّورّون عنهه بيه تلگوهه
اصيله معدله اربات الدواوين وتحير الوصفهه كلما يوصفوهه
ربطتهه الشرف والعزه والدين واشگد حاولوا بس ما يفلوهه
ووجه واحد وجهه يعني وجهين ماصارت ولا گدروا يغيـروهه
وطبع بيهه الكرم مثل الفناجين تنطي بلا ثمن تزعل يخضّوهه!
وتذكر بالفرح حتى المبعدين واذا مرهه الحزن ترفض يعزّوهه
ويحبوهه شكثر واكثر مكرهين وحتى اليكرهوهه يحبّوهه
وعدد دمع اليتامه والمساكين اخاف اعليهه من عين اليحسدوهه
وطيبتهه نهر وايفيض صوبين محتاجين اكمل لو عرفتوهه؟
بغداد العشگ تسوه الملايين جنّه عالأرض للّيقدروهه
وبااوراق الكتب تعني كلمتين بستان الحبايب همه سمّوهه

مثل طفله فرحتي اتخاف من الليل .. يخزرهه الحزن ويگلهه وچ نامي!

قصة جــــــرح

خليني دمع مااصير ابد ضحكات
وعندي اسباب مااصيرن تخليني

اولهه الفرح كاتب علي ممنوع
وثانيهه الحزن كاسر فرح عيني

وثالثهه الفقر عرّاب هالاسباب
ومن العوز ما فرغت دواويني

واتريد ابتسم واضحك چذب للناس
وهذهِ مو صفاتي وانته تدريني

ناضج بالحزن خطيّت التلاثين
واثياب الفرح ما ظنهه تغريني


وضايع من زمن ما عندي بس عنوان
بعيون اليتامه شوف تلگيني

ولأن كنز القناعه مو شرط بالمال
بس ورقه وقلم مرّات تكفيني

ولاجيء للشعر من حيث ماكوا اوطان
تسمع فكرتي وانسان تحويني

وغني وابقه الغني بس بالشعر لاغير
وثورات احتراقي لي كنـز واقنع

لأن عندي القصيده كالملح والزاد
ما ملهه ولا فد يوم منهه اشبع

وشاعر داخلي لو جاع تالي الليل
ياكل بالحروف ويشرب المطلع !!!

وقافيته صغت من قاع هالحرمان
واتخيّل بعد صار الگلب مرتع

ومو صوتي جرح هذا اليحچي وياك
واقرالك بعد من قصتي بس مقطع

ماعندي حلم ينباگ مني بــ ليل
حلمي بس حبر فوگ الورق يركع

وتمثال الأمل كسّرته من زمان
وگلت الواقعي ياصاح راح اخضع

لذلك من تجي تلگاني بس عاشور
ومن يخلص محرم كون هم يرجع
خيانـة
جيش الدمع

هجم جيش الدمع واحتل الخدود ورايات الحزن رفعتهه العيون

من شفتك أمس وي غيري صفّيت  ايد بأيد تالي الليل تمشون

وبعيني بعد زغرانـه دنياي ســاعتهه واحس اتوقف الكون

وانه راجع  انه ويسأل الصار؟ مو هذا الگلت بس هو مايخون

ونصحوك شكثر بس ماخذت راي وبس هوالصدگ والباقي اظنون

هسه شحصلت كل التعب ضاع وگبالك صفوا همّـه يضحكون

وتعرفه بعد لليمشي ويّــــاه؟ عاين وي صديقك هسه يمشون

هذا الچان من تحچيله الاسرار ويصــالحكم اذا مرّه تزعلون

يعني مو جرح والبينه جرحين  ويلــــه ياگلب دبرنه وشلون !؟
يله يا گلب دبرنه وشلون



من رائعة  " ردَ قلبي "

بطل الفلم

ماگلك بطل والدور الي كل يوم  لو دور البطل بالناس ما اثر
ومااحسبه فخر دور البطوله هواى لو ضيف الشرف گبل البطل يظهر
افلام شكثر تلگله عَله التلفاز وافلام شكثر في واقعك تظهر
ومعروف البطل گبل النهايه ايموت  لو ياخذ حبيبه بسرعه هو وفر
ولاهايه تصح لا ذيچ هم وياي  منك يا حبيبي راح شتعذر
مااعيشك حلم عن الحقيقه ابعيد  لو اوعدك وعد بس انه ما اگدر
ولا تبني حلم لو فارس الاحلام  صفط بس حچي لا قدم واخّر
قصتي ويه الزمن مكتوبه بالدمعات  ومخرجهه الحزن ويّاي ما قصّر
ويعيد المشاهد دون اي اذنوب ويگلي بعد حزنك واريد اكثر
وانتاج الفلم بسنين عمري الضاع  واتّاني ربح لو عمرك اتبعثر؟
وتفائل تگلي كل الف تبدء ميل شتفائل اذا اباولهه واتعثّّر
هم مثلي شفت فد يوم مرّك عوز يالساكن قصر ما تعرف العسكر!؟
بسك واقتنع ماتدري بيه شلون گدامي بحر وبظهري الف خنجر
بسك واقتنع ممتابع الاحداث معروفه النهايه اتخيل المنظر
 لا انت تصح لا فوز طبعاَ بيك  وجائزة الفلم للغير تتحضر
يعني قررت بس هذه واقع حال اعلن بعتزالي راحه وتكّتر




ولكن

مابعتك

صح احتاج الك من گال اطخلك راس
موبيدي طبع ما طخ انه راسي

تجرحني شكثر  لكن عشگتك موت
بس بالك تفكّر تجرح احساسي

ومن يوم العرفتك  لا ولا مرتاح
بس تبقه محبتك من اعز ناسي

مااعرف قدر  ربي بلاني بيك
لو يمكن سحر خـّلاك وهواسي

هم شايف بشر  يقسه معه الحبّوه
والحبّه يگـّله عنه مو قاسي


يا جمرالعشگ روحي تريدك نار
اشعلني شعل واحرگلي انفاسي

مابيك الذنب كل الذنب بالروح
من تسأل واگلك علتي بساسي

وشيب بالشعر  تعرف الجاني منين ؟
ماجاني چذب وديت اله راسي !!!

وحبّيتك نعم  بس غلطة الشطار
طلعت مو ألف بس للرقم ناسي
ومابعتك لأن  تعرف لأن لو ليش ؟
مدمن عالعشگ وانت الصرت كاسي




احسك تختلف!!!...  شاعر .. طفل .. مجنون

احسك تختلف ما تشبه الناس  ولا مو بس شعر لا بل حقيقة

واحسك مهجتي وانطيك مقياس  مثل ورده والك گلبي الحديقة

واريدك بس الى وبهاي طماع واريدك كلشي الى مو بس صديقة!

وافكر في طريقه اوصلك شلون  بس اصبر عَلي الگه الطريقة

وبس اصبر عَلي يا سلوة الروح  اعوضك كل سهر ذيج الليالي

غيرك ما شغل صدگني البال  وموشاغل فقط لا انت بالي

وانه ابلياك شفه امفارگه الماي  وتخيل بعد وشلونه حالي؟

وتخيل بعد عني رحت يوم  معقوله الحچي هذا التگوله

عليك اتعلمت من تبعد اشلون مسرح دنيتي وانت البطولة

وتلگاني قوي بس ابچي مرات  وتلگه ابداخلي كل الطفولة

ومن تبعد مثل صحراء وانسان  واموت وداعتك وبكل سهولة

لأن عندي حلم ما صدگت صار  هسه اتريد افز وما أنولة!؟

هسه اتريد تبعد يعني ويّاك  ومن تبقه نعم ويّاك ظلّيت

وحسبني طفل لو حته مجنون وبخت يراد من تحسبني يا ريت

ومااعوفك گلت بالعايش وياى واذا مابي صور ما يعجب البيت!
وصلت فكرتك   لسان حال فتاة كان الحب ذريعة حتى يستغلها

وينك ماترد تغلق جهازك ليش  وكت خلاك ترفض ماتجاوبني

تذكرمن چنت تتمنه تحچي وياي  تنكرهه بسهولة وما تعبرني

هسة وصدفه جابك ليه هذه اليوم ولأن ثق اعله نيتي وما يضيعني

وفضل مني تره من اوگف احچي وياك ونعم بيهه قصد بس لليفسرني

وسمعني عذر لا تستحي من الناس ولدنگ خجل مو عيب سمعني

اقره بداخلك واعرف تفكر شلون كل همّـك ربح لو حتى تخسرني

واعرف غايتك لتظن غشيمه بهاى بس حكّمته عقلي وگلبي طاوعني

ردت اعرف نهاية حبك المزعوم  او وين بياطريق اتريد تاخذني

تحب شكلي فقط لا مو جمال الروح  ولهذه السبب يا باشا تعذرني

صح اني زغيره وعمري بالعشرين  بس اوزن بلد ... والله صدگني

الطيبه مو ضعف والسكته لا مو خوف  بس اخلاق بيتي هي تجبرني

وانطيك اعله مايك مره لو مرتين  لكن للأسف بعدك متعرفني

سامع بالمثل شط ويرد عطشان  هذه اني وصيرن من تجربني

اوصلت فكرتك يعني انتهه الموضوع  ولتحاول بعد هيهات تقنعني

وامسحني بعد من قائمة الاسماء  لأن اسمك بعد هم مايشرفني

وساعه والعطر كل الملابس هاي  لو سألوك عنهن بيهن اشكرني

وروح براحتك خلصته ثاري وشوف تتندم عَلي بعدين تذكرني

ونصحيه للتحب ( أم ) باچر تصيرين  وترجع للحچيته وهي تفهمني



الى كل من لا يعرف معنى الحب عليه ان يراجع نفسه! وان لم ينفع فهو ميت
نزوة ليل

من الباب ادخل مو من الشباچ اذا اتحبهه صدگ اتقدملهه

مثل اختك عرفهه واحد من الناس ترضاهه عَليه من يستغلهه

تعيشهه بحلم بي عائلة واطفال خاف الله ولك شتسولفلهه

وحدة اثنين عندك هيه يا ترتيب وعلى شكم وحده ضاحك هم مثلهه

وفندق لو گلب هذه العايش بيه ولا غرفه صدگ من تدخللهه

كافي ماتحس يمكن ضميرك مات وين الفاتحه حتى اوصللهه

ابوهة شگد تعب رباهه بالدمعات وامهه حدبت بس تـكبرلهة

وعلى الحاضر تجي ياحضرت الاستاذ ماتوصل شبر والله الكحلهه

شمعة بيت هي وانت نزوت ليل ولوگالوا شمس ماتسوه ظلهه

احسبهه عدل باچر وراك عتاب شتگلهه اعتذر متصرفلهه

وفكر تستقر لا تبقه ريشه بريح شباقي من العمر روحك تذلهه

ومااگلك نبي ومااصيرن افلاطون بس المشكله تگدر تحلهه

هم مثلك چنت والعب على الحبلين! وماتسوه شفت من اصفنلهه

تصح وحده نعم مو زينة بس مرات اصابيعك لأن مو عدله كلهه

وتصح وحده تعجبك لكن بالحظات وباچر من تجي يمكن تملهه

وتصح وحده اصيله من الالف للياء وبس خيالهه من يگدرلهه

وتصح وحده بعد ماتسمع الهه الصوت بس مدوخ العالم خجلهه

واخلاق وقيم تتوارث الاجيال مو غايه وطمع مستقبل الهه

ومثل ورقه الشرف لو تحترگ بالنار لو تكتب قصيدة بس تجلهه

ونصيحه من تحب تختار عدهه احساس مو عدهه شكثر حلوه بشكلهه



بعد اربع سنوات من الحب والذكريات الجميلة اخبرته
ان اهلها لايوافقون على زواجهم لانه من عائلة فقيرة !؟..فبعث لهابرسالة يقول: 
 حب في الجامعة (سر الحب )
مجنون واسولف وحدي وياك بحيث اتخيلك وياي بالبيت
عند اهلك نعم بس عايش وياي وحتى افراش الك بالغرفة خلّيت
واتصور بعد من اشتهي الزاد اعزل حصتك وبجوعي ظلّيت
وانسه حتى اسمي من ينادون ومن صاحوني باسمك ( ها ) ردّيت
ومن اطلع بعد للباب احتار ماكوا احد واحسك انت دگـّيت
واطلعلك حلو والبسلك اشكال ادري اتشوفني بيك اني حسيت
وبكل الشوارع انت الگاك وعلى الحيطان رسمك لو تعدّيت
واسمك مايفارگ شفتي لحظات وبنص الگلب احروفه خطّيت
ومن اشتاگلك يانسمة الروح اشتم بالهوى وبلهفه ضمّيت
واعرفهه الظروفك واعذر الحال وعنك ياحبيبي ماتخلّيت
ومن طبعي مزاجي وازعل هواي بس وياك اگولن ماكو ملّيت
ويحبوني شكثر واحسبهم اخوان بس انت عشگ بحساسي مرّيت
وغيرك أي بشر مايملي العيون بس انت وغلاتك ماتمنّيت
وانتظرك عمر مو يوم يومين  ومقصر تره مااگول ضحّيت
ونـّـزوج حبيبي نبقه عزاب ميهمني المهم عندي اني حبّيت
وكل هذا وبعد تسألني الناس اتحبه وجوابي إيدي هزّيت



الى سيدة في الأربعين التقيتها صدفة في شوارع اسطنبول الجمال
مَــتكبرين !

يا قبلة ترف يا معبد الحلوين .. متكبرين
ياطعم الوفه بملوحة السبعين .. متكبرين

يا ثامن عجيبه وانتي ماتدرين!؟
بعيوني البشر كبرانه بالحظات
وانتي شماكبرتي بعمرچ اتزغرين .. وهم تحلين

يالكلچ براءه من الجدم للراس
ويالطولچ نيافه وهم غـَـنج تمشين

ولا تنسين .. حلوه بالفرح وبحزنچ اتخبلين!؟
واحساسي الدليل وحتى تقتنعين :

من ثغرچ ضَـحك مثل اليصيح افراج
ولو دمعچ نزل چن زمزم وتبچين

وازيدچ للعلم تنويه : صار احراج
وانصحچ هم بعد لسّوگ لطبّين
وي بتچ امس شافوچ كل الناس
گالوا هاي اختهه امهه ممصدگين!

واشكال الحچي واحله الغزل واشعار
وتسوين نفسچ انتي متسمعين

ومو بس الزلم داخت يحلوه بيچ
نسوان اليمرن موت مغتاضات
بعيون الحسد من انتي تتعدين

وابو الگهوة بعد حط لافتة عالباب
موگلنة گبل عالگهوة لتمرّين؟! مــاتقرين؟

وصفه حتى الرصيف بجيتچ ولهان
وخصوصاً لو وگفتي فوگة تنتظرين؟

وتأشرين : بساط الريح وينه وفوگه اتصعدين
وياخذني القلق والخوف والصفنات

لحد مابالسلامه البيتچ اترجعين .. وشترجعين

يابيت اليلمچ وانتي كلّچ بيت
لازم سور عدنه وكون سور الصين

وشسّـوين : من الله الجمال البيچ شسّـوين
لامكياج ينفع لاعطر لاثوب
انتي بدونهن ياعمي وتموتين

لتخسرين .. وتعبين .. وتخلين : تنحسدين
وابقي ابيتكم يمعوده لطلعين

بس عندي المهم بعيوني بت عشرين
بس عندي المهم بعيوني متكبرين .. ولتكبرين

فقط يبقة سؤال احتار بيه البال
يحبوچ شكثر بس انتي متحبين؟




ليس ان تراني كل يوم ولكن ان تذكرني في غيابي!!!...
الشُهرة
ما محتاج واطلع عالفضائيات
لأن عندي الشعر مو هذه مقياسه
ولا محتاج يوم اتملق الانسان
واذا كاسة فرغ أملي اله كاسه
انه شاعر وطن تحتاجه كل الناس
مثل حال الوطن يحتاج كل ناسه
وانه شاعر قضية اتعيش بالوجدان
والتاريخ يذكر اسمي كراسه
وتره الشاعر نبي لكنة ما معصوم
بس فكره ال (مُحمد)  يحمل براسه
وتره الشاعر (غَني) لكن فقير هواي
ويملك بس قلم والورقه واحساسه
وكلهة تعتزل لاعب واذا فنان
بس الشاعر الما يعلن افلاسه
وكلهة تروح بس الاصلح اليبقون
ومعروف الصدگ لو هبت انفاسه
ومابيهه فخر تبني تفلش ابيوت
ابزود الخشب من تحچي الفاسة
والمرّه شته ماينخه وين فلان
بثيابه انتخه يوم البرد جاسه
واذا ساسك رمل لا تبني فوگه قصور
اليبني من صدگ وسط الگلب ساسه
واذا عندك نقص لتصير فاعل خير
بيك المشكله ما حاجه لــ دراسه
ولتجامل بشر من عنده ليش اتخاف
الشاعر كالمَلك جمهوره حراسه
وماأهتم الك ثق واعتقد بالله
ولامره صرت في بالي وهواسه
لأن اتخيلك واحد مثل ذولاك
گاعد عالرصيف وبيده حط طاسه
ومن حبني صدگ يندل تره الخدين
مو مثلك لأن ياهو الأجه وباسه

شاعر ..  مو مهم تعرفني كل الناس شيفيد الشعر واخلاق ماعندي!؟

رساله الى كل من لا يهمهم الأمر
                                           والمدرجه اسمائهم ادناه :

شاعر للأسف مدمن محطات يوميه وطلع نفس القصيده
وشاعر يفتخر صاحب علاقات واسمه ظال كل ساعه بجريده
وشاعر مرحله حي هو بس مات ؟! وطلاّب الشعر ظنهم عبيده
وشاعر مختص بعلم الزحافات واتگول الشعر من صنعة ايده
وشاعر عالورق سطّر عبارات كل ظنه الشعر شغله وتفيده
وشاعر من حضر بالمهرجانات يشوف الناس بدلاته الجديده!
وشاعر من صعد فوگ المنصات تحس حتى الخشب لا ما يريده
وشاعر من قره ماتسمع اصوات تصّفگله
بــــــــــــعد وتگله عيده
بس شاعر صدگ ..
 بس شاعر صدگ ..  جوعان من بات!

 بس عنده المهم تكمل قصيده
 _____________________________
 


ومضـات & بطاقـات

* شاعر...
مو مهم تعرفني كل الناس
شيفيد الشعر واخلاق ما عندي  !!!


* بس نوع طبع الوفه
بس نوع طبع الجفه
هذه حسب قاعدة
يعني ضميرك صفه :
لو فاقد الذاكرة
لو ذاكر الفاقدة


* اخر زمان الوتر يتبره من زرياب
اخر زمان المطر ما يعرف السياب


امي (عليها السلام)

* امس للجنه فتت  اني علماً ما متت
وشفت كل شي وما شفت!

بعد هذه تحيرت؟
السبب بس تالي اعرفت

تحت رجليهه نمت
تحت رجليهه نمت



* امي كعبة والدليل هي كعبة
شفت صورتهة بعباية!...


* شاعر عاش عمره حسرة العوز
وشاعر بالترف من عاش عمره
شوف انته الفرق مابين الاثنين
ياشاعر تحس من تقره شعره؟


 * شگد عيب الخشب
من صار يدة فاس
ولا گصته استحت من طاحت الشجرة!


* مجنون واسولف وحدي وياك
بحيث اتخيلك وياي بالبيت
عد اهلك نعم بس عايش وياي
وحتى افراش الك بالغرفة خليت


* مرّت سنه من العمر
مرّت گبلهه سنين
نتمنة چنه الكُبر
بس هسة متندمين
جبنه العمر ننتظر
قانعنه چان الصبر
باچر يگول الفرح والباچر امتانين


* مادام گلبي يحب
ماعنده شوگي حدود
ومادام اكتب شعر يعني انا موجود


  * بعد ماكوا وفه المن نوافي نمسح بالدمع ونگول كافي
طلعوا للأسف بس بالأسم عشاگ نتعب والتعب للغير صافي
ونتعلم بعد منكون طيبين ومن اليوم عدنه يصير وجهين
وحتى نتفق ياگلبي مانشتاگ ونبدل السهر نوم العوافي


* شيصير لو طلقة غدر ابراسي تركض طايشة
وشيصير لو ميت انه وامي الحبيبة عايشة


* تعبنة هذا الوطن كل يوم عنده جرح ويصيحنة نخيطة
ولاهو غني لا فكَر حيرنة شايل ذهب واطفالة ابلا غطة
وكل هذا مايتعض ويكول عندي ارض وفوكَاهة عندي علم واحنة بلا خارطة


* مجنون واسولف وحدي وياك بحيث اتخيلك وياي بالبيت
عند اهلك نعم بس عايش وياي وحتى افراش الك بالغرفة خلّيت
واتصور بعد من اشتهي الزاد اعزل حصتك وبجوعي ظلّيت
وانسه حتى اسمي من ينادون ومن صاحوني باسمك ( ها ) ردّيت
ومن اطلع بعد للباب احتار ماكوا احد واحسك انت دگـّيت


* لا لا ترد... خليني ذابحني البعد
واشتاگ لكن للأسف شوگي مثل صوتي يرد
لا لا ترد...خليني وحدي انه احترگ
مابين چذبك والصدگ ضاعت لهفتي والعشگ
وحالي مثل حال النخل مذبوح بس ينـزف عثگ
واذكر چنت لمن تجي واخجل چنت من الحچي
ومكسور خاطر ما ترد .. لا لا ترد


* اكو شاعر خوش شاعر ..يكتب بدمة القصيدة
واكو شاعر چان شاعر ..
وهسة ماعندة جديدة
واكو شاعر والله شاعر ..
وللأسف محّد يريده
واكو شاعر .. عاش شاعر .. و مات شاعر ومنذكر اسمة بجريدة
* دستورك غلط سوّيله تعديل
محتاج الشعب شاعر يقوده !؟


* فرق بين اليجوع وهو جوعان
عن ذاك اليجوع وهو شابع
وفرق بين السكن في اعله القصور
والبيتـــة رصيف وبابه شارع


* المافكر بهم الوطن هم الوطن ميريده
والماكتب لجلة شعراحسن الة يگص ايده...


* راح اقره شرط كلكم تصفگون
والراد السبب هم ممكن اقناعه
اجه يسمع شعر ويريد ترحيب
احتراماً للوطن ويانة بالقاعة


 * مجنون هذه الزمن
ماعرفه شيريد...
يمطرعليهم فرح واني التجاعيد!!

 
* سألوا عاللقب ليش العراقي اختار
خاف انسة الوطن ويه اسمي خليته
وسألوا ليش الاول واسمة ثاني صار
گلت يمسه سوء بظهري ضميته

 
 * يا قبلة ترف يا معبد الحلوين .. متكبرين
ياطعم الوفه بملوحة السبعين .. متكبرين
يا ثامن عجيبه وانتي ماتدرين!؟
بعيوني البشر كبرانه بالحظات
وانتي شماكبرتي بعمرچ اتزغرين .. وهم تحلين
يالكلچ براءه من الجدم للراس
ويالطولچ نيافه وهم غـَـنج تمشين

 
* محتاج طيبة گلب مزروعه بين الناس
وياريت كل البشر مافاقدة الاحساس
واتمنه اشوف الورد ينشم ولا ينداس
وترد سوالف امس حب ومحنه وهمس
وتطلع علينه الشمس وچف الصدگ ينباس


 * خاين طلع حتى القلم امنته عود اسراري
ايغار من اكتب الك بس بي چنت ما داري
والورقة هم ويا بعد يا ورقه ليش اتغاري
تالي اعرفت غيرالقلم لا ورقتي ولا اشعاري
اتغار منك للأسف حتى بنات افكاري!


* راجعت نفسي وشفت ويّاگ ما غلطان
بس چه احبك صدگ...گلتلك اسف!


* خربت من شفت جنحان عند الفيل
ومن شفت النوارس صارت ذيابه!
وخربت من شفت مرة الاسد مرعوب
خايف ماطلع بالليل للغابة!


 * اذا باچر يجي يعني الامس راح
بس خوفي الامس نلگاه باچر
واذا كل يوم نحلم باچر يكون
يا خوفي صدگ ما نلگه باچر


* اذا الشاعر نبي في نظرة الناس
اذاً مو بس جزء فلم الرسالة...


* نفـس اهدومنه مال اول العام
لبسناهن امس گالوا اجه العيد
ونكَدر نشتري بس تدري شنريد
كون كَلوبنه لو تلبس اجديد
ونبطل بعد ما نحچي عالناس
ولا واحد بعد ياخذله غيبه
واذا عدنه عجيبه صدق الاحساس
من ناكل بعضنه مو عجيبه


* وين الگاچ
متفهميني وين الگاچ
مِبحرمن زمن يمته اوصل المرساچ؟


 * مو مهنه الشعر
فن وصدق واحساس...
ولتذل القوافي الخاطر اجيوبك
وتعال بشي جديد وعوف من سبقوك
وبــ ازياء الشعر خل ينعرض ثوبك
باچر من يجي ما يرحم التاريخ
لحّگ صفحة سجل تمسح اذنوبك


 * ليش اتغار...
بس فهمني ليش اتغار
اذا أني ( .ُ... )  صير اليه الغار


 * عمي التواضع حلو ماكوا احله من عنده
ولتشيل خشمك علي ياصاحبي اتهده
ربيتك انه بدي معقولة تكبر عَلي
علمني وكتي درس حط طينته بخده


* من يحتاجني كل ساعة دگ الباب
ومن سألوا عليه يگول مااعرفة؟


* ( عَـلي ) شاعر لأن باب العلم صار
في حرب وسلم تشهدله ايده
واذا سيف قلم واعدائة الاوراق
يعني المعركة مثل القصيدة


 * اخذ روحي بعد لو كَلبي ماكفاك
او روح امي حلفت صدكَني ماترجع


 * حاير تظل لشوكت وعني تظل ابعيد
وبس بالحلم نلتقي وگلي الحلم شيفيد
ادريك مامقتنع وتذوب مثل الشمع
اتريد يمي تجي ونفس الوقت ماتريد


 * شكتبلك بعد موخلصت الچلمات
وياشاعر يداين خاطر اكتبلك؟


* يحسدونه شكثر حسبونه عالعشاگ ويگلولي شكثر من عدنه بگته
وگتلهم چذب بس بالأسم محبوب ومتندم على يوم العرفَته
لأن طبع اليحب معروف عند الناس صافن والحچي كله ابصفنته
وانت لا تحن لا مثلي هم تشتاگ وقانون العشگ وحدك عزفته
موهيچ اليحب گلب اليحب ولهان ولا گلب اليحب هم هيچ دگته
كل ساعه احترگ طافيني دمع العين وترجع حضرتك ثاني وشعلته
ومثل عالم صرت بس تخترع الاعذار ولعلمك نعم هسه افتهمته
بستانك حزن منه جنيت اهموم ماجاني الفرح لايوم ضگته


* على هذه الگلب كثره اليمرّون وعيونك فقط بس انت باقي
وصحيح انت حلو وهواي عشاگ لكن يختلف عشگ العراقي
والله يختلف عشگ العراقي...


* تره الشاعر نبي لكنه ما معصوم
بس فكره ال (مُحمد) يحمل براسه
وتره الشاعر (غَني) لكن فقير هواي
ويملك بس قلم والورقه واحساسه


* شاعر على كد حالي وماعندي غاية ابالي
مافكرة مرة اشتهر لو بيع في يوم الشعر
ماممكن يقدرة سعر احساسي كلش غالي


* مانزعل عليك اگلوبنه اكبار
وعنهم نختلف حتى بهوانه
وماعدنه طمع لاغاية وياك
عاتبناك من باب الميانه
ولأن بينه طبع مانحچي وجهين
تلگله وجوهنه تشبه گفانه !


* الشعر مابي كبير ولا صغير
الجمال احساس جيب اليفهمه!..


*  نفترگ لاياحبيبي مستحيل
واحد احنة شلون گلي نفترگ
والعشگ مثل الهوى وابسط دليل
من يروح الهوى يعني نختنگ
والبعد واضح يتعبك مو قليل
واحلى طعم الحب اذا بي نحترگ


 * اكوا ناسيك لكن گلبك اوياه
واكوا وياك گلبه وانته ناسيه!

 
* بيه ماتحس من الصبر ملّيت
ومن حبك بعد گلي بعد شخفي
تظن اشتاگ الك لومرة عني تروح
والله اشتاگلك لوتوگف بصفي

* مااحب الشعر بس انته عايش بيه
ولهذا السبب مجبور حبيته...؟!


 * كل مااشوف اثنين تنزل دمعت العين واتذكريتك
ارجعلي كافي فراگ والله الك مشتاگ موگلبي بيتك
انته حياتي وبعد احلى امنياتي او وعد لامانسيتك

* چنت المدرسة  وبيك الشعب طلاب
وبس دگ الجرس شو فارغه اصفوفك؟!

  * عله بابي تمر باليوم مرتين
ويوم الماتمر يشتاگ حتى الباب
وموجمعة وسبت عندي اني سنتين
ومااحب العطل والشوگ إله اسباب

* اذا مابيك وتكمل قصيدة
مو كلشي التكتبه اتگلي ومضه!...


*  كبير انه يگلكم عندي جمهور
وعلى الشاشات اطلع والصحافة
مايعله عَلى گلوله مغرور
امس چنت انه اعدله زحافـــــة!


* كافي سامحت وهواي الك عديت
واعذارك بعد بيهن ولا اقنع
اطلع من حياتي وسد وراك الباب
او روح امي احلفت صدكَني ماارجع

 
* رسمك لو طفل والعين امه تصير
من عيني بــــــعد صّدگ فطمته!


 * اخيراً ايدك بايدي حبيبي
اخيراً انته ياعمري نصيبي
شگد سهرنه شگد صبرنه
الله ماضيع تعبنه .. اخيراً

 
* بغداد حلوة تره رغم الحصل والجره
حارسهه واحد الاحد وماتبچي تضحك بعد
خل يسمع الما دَره بغداد حلوة تره...


 * نغلط نعم مو مشكلة
بس المهم ياصاحبي نتعلم من اغلاطنه
يوجد فرق واضح لأن
مابين نفهم عن كُبر واخلاقنه من اگماطنه
من الشمس ناخذ درس
لكن نحبهه للأسف لو مر علينه اشباطنه

 
* انه ابلياك احس الدنيه انته!!!...

 
* تعالوا انحب بعضنه وننسه مافات
تعب حال الوطن من الخلافات
وحتى اطفالنة تعيش وماتسأل بعد ليش
شرط گول وفعل مو بس شعارات


 * راح اصير.. بس شصير ..
شاعر وبايع ضميره لو اظل شاعر فقير!؟


* انه اعرف راح ابقة الوحدي
وبس الذكرة تعيش وياية
وانة اعرف كلشي بس لكن
مااريد ارفع هسه الراية
اتعذبني .. وتحيرني .. وتسهرني
نصحوني شگد ناس هواية


* نصحتك مانفع وياك يفلان
موقصدي الفرس بس همة خيالة!؟


* ميفيدوك يسمر مو نصحناك
ماتاخذ حچي والله عرفناك
بس شكلك يحبون
الگلبك مايهمون
وترد تشكيلنه وشلون وياك


 * عَلة بابي تمر باليوم مرتين
ويوم الماتمر يشتاگ حتى الباب!


* گتلي اموتن من اعوفك
ومن عفتني مامتت!
وگتلي بس انته اشوفك
هسه شوغيري شفت!


 * انة بلياك شفه مفارگه الماي
وتخيل بعد وشلونه حالي؟


 * من الباب ادخل مومن الشباچ
اذا تحبهه صدگ اتقدملهة
مثل اختك عرفهه واحد من الناس
ترضاهه عليه من يستغلهة


* ياگلبي كافي چذب كل يوم وحدة تحب
اصحة الزمانك ولك
بالله ارد اسألك : ماتتعب من العب

 
* عَـله انقاض الدمع رممنه الخدود
وواعدنه الضحك بس ما لگانه
ماندري الفرح بس لـــ اهل القصور
لذلك يعتذر مامر واجانه؟!


 * كلي اشتعل .. لمّن تهل يسمر يا ابوعيون الكحل
سبحان ربي الصورك يحبيبي وك تكتل كتل
تنطيني من عندك وعد ومااريد من عندك بعد
واحد اذا يمك گعد اتگوم لو حتى طفل


* اذا عالصوت احبك اني بجنون
ويحالي شلون لو بعد التقينة؟


 * احزن من يمرعام..احزن من يجي عام
والأيام.. صارت اسرع من الضوء
وقانون الجَذب هم يشمل الايام؟
والأحلام.. بالتوقيف منتظره الحكم
افراج مدري اعدام!؟...


* اعلن عن وطن مفقود
منكم ياهو الشافة
دمعاتة جرن نهرين لكن تضحك شفافة!!!

 
* مسجون الصدگ يا ناس تدرون
واخذوا كــل چذب طلقوا سراحة
للتعبان گالوا تبقة تعبــــــــــــــان
والمرتــــــــــــاح تحتاج استراحة

 
* مثل طفلة فرحتي اتخاف من الليل
يخزرهة الحزن ويگلهه وچ نامي!

 
* الشاعر يختلف حبه للحسين
من يطلع عَزة متشوفه هالناس
لأن عنده القوافي كالتشابيه
ويلطم بالقلم ويبچي الاحساس


 * اشتهيتك گطره گطره من گاعك الحد السِمه
اشتهيتك واحة خضرة بيهة بس حبنه النِمه
لاتگلي مرّة خايف
ليش موصحرة الشفايف
ولشوكت نبقة بضِمه .. اشتهيتك


* مااحبك چذب والله ذايب بيك
بس دور عليه بيك تلكاني
واذا هذا الاگوله تظن ابالغ بيه
تگدر تنسحب بس صعبة تنساني
* انه ويالشعر نتشابه هواي
وابسط شبه يجمعنه يتامة!!..

 
* كون حبك مو عشگ هذه الزمان
كون حبك مال اهلنة الاولي
وكون گلبك ما يدورلي مكان
كون گلبك يا حبيبي كله الي
وكون عمرك ما تحس لحظة بأمان
الة بحضاني تذوب وتنجلي
وكون شخص ما يهم ابشخص ثان
بس اريدك كون بيه تبتلي !

 
* محتاج الواحد يسمعني
بس يسمعني بكل احساس
محتاج الواحد يفهمني
ما يشبه كل هاي الناس؟


 * من مرنه الشته وماعدنه قمصان
ندفه على اوراق الجرايد
وما ننشر بعد نحفظهه الاشعار
شفنه النار تاكل بالقصايد...


 * نتواعد حبيبي ونلتقي ابيت
اذا ما عجبتك كل القصيدة؟

 
* من تقره شعر لا تنسه الاحساس
شرط كون الشعر صدق المشاعـر
وبصوتك فقط بي تقنع النــاس
مو كل من يصيح يعني شاعــر

 
* خلصت العمر خلف الكواليس!
يمته يا شعب تاخذ بطولة؟..

 
* الحرّية .. فكرة و ورقة
يمكن ترقة يمكن تبقة
بس بالك لا تصبح طلقة

 
* خلف الله علية وعرفته الناس
شاعر چان يكتب محد يعرفة؟


* مااريد بابي تدگ .. تحرجني ما عندي
ومااريد عالارصفه الگه الصبح ولدي
ومااريد اعبر جسر والگه مَـره اتجدي
ومااريد ابن الوطن يحلم لِبس جندي...


* اذا ياهو اليجي گال اني خيال
بعد يومين اذن مانلگه فارس!


 * معذور الحزن نتشابه انه وياه !
ما عنده وطن … سكنته باهاتي
سؤال: ماعنده وطن ؟ جواب: ابقه بلا وطن !
ابقه بلا وطن ... شكراً تحياتي


 * يا كل شي بحياتي يا حلم دنياي
   يا دمعة فرحتي بضحكة احزاني
يالحبك خرج عن طابع المألوف
من گد ما يحبك غار مني اني!


 * خسران اعترف والحب تجاره صار
وبايع مشتري كل شي خسرته
بس ابقه القلم وانته الورق جوّاي
وبكيفي الاريده والشطبته


 * اتفائل تگلي كل الف تبدء ميل
شتفائل اذا اباولهه وتعثر
هم مثلي شفت فد يوم مرّك عوز
يالساكن قصر ما تعرف العسكر
بسك واقتنع ماتدري بيه شلون
گدامي بحر وبظهري الف خنجر


 * لأن عندي القصيدة كالملح والزاد
ما ملهه ولا فد يوم منه اشبع
وشاعر داخلي لو جاع تالي الليل
ياكل بالحروف ويشرب المطلع !!!


 * حبّيتك نعم  بس غلطة الشطار
طلعت مو ألف بس للرقم ناسي
ومابعتك لأن  تعرف لأن لو ليش ؟
مدمن عالعشگ وانته الصرت كاسي


 * احسك تختلف ما تشبه الناس
ولا مو بس شعر لا بل حقيقة
واحسك مهجتي وانطيك مقياس
مثل ورده والك گلبي الحديقة
واريدك بس الى وبهاي طماع
واريدك كلشي الى مو بس صديقة!
وافكر في طريقة اوصلك شلون
بس اصبر علي الگه الطريقة


 * هجم جيش الدمع واحتل الخدود
ورايات الحزن رفعتهه العيون
من شفتك أمس وي غيري صفّيت
ايد بأيد تالي الليل تمشون


 * عدهم كل شمس تفصل نهار وليل
بس عندي الشمس تشتاگ تنزلك
واذا عندي الشمس تنزل لأن تشتاگ
چا... يعني الگمر ينزل يحب رجــلك


 * والله وكت طيبة تنكره
والله وكت ويصير ذكره
وبلا سبب وانته النسيته
لليوم شاغل تدري فكره .. والله وكت


* مو عيب الفقر بس عيب الانسان
شاعر صار بس من يقره بفلوس
وشگد صعبة وهضيمه تلگه فنان
يغني بالملاهي الحضرت الكوس


* اني ميت من زمان
بس محبتك يا ترف تحيني!


* من مرني العطش وشفافك الماي
مااشرب گلت خايف عله شفافك
واقبل لو متت بس بقه عطشان
خايف ارتوي واگلبهه اوصافك


* متغير علية هاي الايام
ولاذاك العرفتك اني من عام
صاير حيل بارد
ليش وعني باعد
مو چنت بحناني تغفة وتنام


* لان طيب گلب مادورتهه وياك
وانت بكل سهولة تبيعهه الظلي!؟


 * بس باوع عـلى وتبين الاعذار
ما محتاج منك كلمة تتعذر
من وجهك واعرفك بيك ما احتار
معقولة الغدر ما يعرف الخنجر


 * انه گلبي حمامة انباگ منهه العش
تظل طول العمر مكسور خاطرهة
مثل كاتب قصيدة وساهر الهة الليل
تِلكاهه الصبح مو هو شاعرهة!


 * ما محتاج واطلع عالفضائيات
لأن عندي الشعر مو هذه مقياسة
ولا محتاج يوم اتملق الانسان
واذا كاسة فرغ أملي اله كاسة
انه شاعر وطن تحتاجة كل الناس
مثل حال الوطن يحتاج كل ناسة


 * مو عندي المهم انشرعالانترنيت
بس عندي المهم من توصل الفكرة
الشاعر من صدگ ترجم ألم هالناس
مو شاعر چذب لو دور الشهرة


 * اذا ماكوا نقد معنى الشعر ضاع
لأن نقدك ألي يعني أني شاعر
واذا ماكوا صدق عند الينقدون
اذاً اعدام نحكم عالمشاعر


 * اذا ناوي تحب وتكون ولهان
لاتخفي خجل بيك المشاعر
واذا قصدك تحبني كون يفلان
حبني انسان لا تحبني كشاعر


 * شاعر للأسف مدمن محطات
يوميه وطلع نفس القصيدة
وشاعر يفتخر صاحب علاقات
واسمه ظال كل ساعه بجريدة
وشاعر مرحلة حي هو بس مات ؟!
وطلاّب الشعر ظنهم عبيده
وشاعر مختص بعلم الزحافات
واتگول الشعر من صنعة ايده
وشاعر عالورق سطّر عبارات
كل ظنه الشعر شغله وتفيده
وشاعر من حضر بالمهرجانات
يشوف الناس بدلاته الجديدة!
وشاعر من صعد فوگ المنصات
تحس حتى الخشب لا ما يريده
وشاعر من قره ماتسمع اصوات
تصّفگله بعد وتگله عيده
بس شاعر صدگ ..  جوعان من بات! بس عنده المهم تكمل قصيدة

_________________________________________

 "سيرة ذاتية"

ضرغام العراقي
الاسم الكامل : ضرغام جواد رضا موسى الخالدي
الاسم الفني : ضرغام العراقي
مواليد الديوانية  16 أذار 1978
دبلوم تقني / الديوانية -  هندسه تقنية / بغداد
شاعر شعبي وكاتب مستقل
رئيس تحرير منشور المنصة ( فكرة واعداد و نشر ) توزع مجاناً
مُعد ومندوب وناشر في اكثر من صحيفة ومجلة وصفحة ( أدب شعبي ) عراقية وعربية
عضو ومشرف في اكثر من مؤسسة ومنظمة ورابطة ومنتديات عراقية وعربية
عضو مركز النور للثقافة والاعلام وعضو رابطة الكتاب العراقيين
عضو اتحاد المدونين العرب وعضو تجمع شعراء بلا حدود
عضو ملتقى الادباء والمبدعين العرب وعضو ملتقى الكلمة نغم العربي
عضو مؤسسة أبيات الخليجية... الخ 

*المشاركات والنشاطات :
* المهرجانات والأماسي والمسابقات الادبيه والشعرية
المحلية والقطرية والاقليمية وكذلك في اكثر من محافظة ومدينة ومنتدى ثقافي وشعري

* فائز وحاصل على اكثر من جائزة ودرع ابداعي وشهادات تقديرية محلية واقليمية
* النشر في الصحف والمجلات العراقية والعربية منذ عام 1999_2000
* لقاءات في الفضائيات والاذاعات المعتدلة وفي الصحافة ووسائل الاعلام الألكترونية المنوعة

* صدرت مجموعة شعريه بعنوان ( شكتبلك بعد ) بطبعتين 2012 و2011  ( ومضات وبطاقات ) شعر شعبي عراقي وألبوم شعري ( والله وكت ) 2013  MP3 وديوان شعري ما يزال قيد الاعداد منذ اكثر من 3 سنوات  لدواعي شعرية و ديوان مشترك قيد الدراسة
  
توقيعي :

 شاعر مو مهم تعرفني كل الناس شيفيد الشعر واخلاق ما عندي!

من احتراقاتي :
*وطن يحتضر وشعب ينتظر!
*  أستطيع أن أكتب لك كل يوم قصيدة..  لكن لا أستطيع أن أكتب لك كل القصائد في يوم..
لأنني كل يوم أجدك أجمل...
* شعب الله المحتار لا يستطيع ان يفتح فمه الا عند طبيب الاسنان
* عندما تطرق الفرصة بابك فلا تنظر لها من ثقب الباب
* رغم صغر سنة لكنه بداء كبيراً
* سأخلق لوطني الاعذار حتى لا احقد عليه
* الشاعر انتهازي لانه يستطيع ان يحول كل شي الى شعرا
* مادام فيروز تغني فالأمل موجود
* لاتحزن ان الشعر معنا والقلم الحمامة والورقة خيوط العنكبوت
*  الشهرة سهلة جداً ... لكن الصعب هو الإبداع

*  الشهرة ليس أن تراني كل يوم ولكن أن تذكرني في غيابي

*  سافرت تهريباً إلى دولة الشعر لأن لا أحد يقبل أن يختم جوازي !؟

*  مازلت ابناً عاقاً لوالديه ( القلم والورقة ) ولا أعلم متى سأنال رضاهما؟
* عندما أيقنت أن الحب كلام على ورق .. قررت أن أصبح شاعرا

 * أنتِ : عديمة اللون والطعم والرائحة لكنك لست الماء!!!...

 *اختلاف الحب قد يفسد للقلب قضية

 * مشكلتي يا سيدتي أني أعشق كل جميل .. لكني لست الله ...

 * أتعلمين لماذا الله خلقك قصيرة القامة حتى عندما تنظرين إليه مرفوعة الرأس
* تعدد الاحباب والقلب واحدٌ
* انسان بدون الحب لايعيش وشاعر بدون الحب لايكتب
* الشاعر يحوم حول قصيدته

الاقتباسات المفضلة :
" من يعرفني يكتشفني أما أولئك الذين لا يريدون أو لا يستطيعون فعبثاً احاول التوضيح لهم" بودلـــــــــــــــير

معلومات الاتصال :

_________________________________________ 

ضرغام العراقي ألبوم (( والله وكت )) Mp3 شعر شعبي 




 
 





 



 
احتراقات عراقي!

* وطن يحتضر وشعب ينتظر!

* أستطيع أن أكتب لك كل يوم قصيدة.. لكن لا أستطيع أن أكتب لك كل القصائد في يوم..لأنني كل يوم أجدك أجمل...

* شعب الله المحتار لا يستطيع ان يفتح فمه الا عند طبيب الاسنان

* عندما تطرق الفرصة بابك فلا تنظر لها من ثقب الباب

* رغم صغر سنه لكنه بدأ كبيراً

* سأخلق لوطني الاعذار حتى لا احقد عليه

* الشاعر انتهازي لانه يستطيع ان يحول كل شي الى شعرا

* مادام فيروز تغني فالأمل موجود

* لاتحزن ان الشعر معنا والقلم الحمامة والورقة خيوط العنكبوت

* الشهرة سهلة جداً ... لكن الصعب هو الإبداع

* الشهرة ليس أن تراني كل يوم ولكن أن تذكرني في غيابي

* سافرت تهريباً إلى دولة الشعر لأن لا أحد يقبل أن يختم جوازي !؟

* مازلت ابناً عاقاً لوالديه ( القلم والورقة ) ولا أعلم متى سأنال رضاهما؟

* عندما أيقنت أن الحب كلام على ورق .. قررت أن أصبح شاعرا

* أنتِ : عديمة اللون والطعم والرائحة لكنك لست الماء!!!...

* اختلاف الحب قد يفسد للقلب قضية

* مشكلتي يا سيدتي أني أعشق كل جميل .. لكني لست الله ...

* أتعلمين لماذا الله خلقك قصيرة القامة حتى عندما تنظرين إليه مرفوعة الرأس

* تعدد الاحباب والقلب واحدٌ

* انسان بدون الحب لايعيش وشاعر بدون الحب لايكتب

* الشاعر يحوم حول قصيدته؟
 ــــــــــــــــــــــــــــــــــــــــــــــــــــــــــــــــــــــــــــــــــ

عشگنـــــــــــــاك 


شعر شعبي MP3 استماع وتحميل مباشر
سر الحب
http://www.gulfup.com/?AQ6sCC
كون حبك
http://www.gulfup.com/?y8Z0se
لاترد
http://www.gulfup.com/?Y4nbZt
نصيحة حب 1
http://www.gulfup.com/X3opmlkwl52sq
نصيحة حب 2
http://www.gulfup.com/?v8ibsn
خلصت حفلتك
http://www.gulfup.com/?sKxpIy
لاتفرح نسيتك
http://www.gulfup.com/?IiwCBj
متكبرين
http://www.gulfup.com/?rb9hNe
اذا زعلان
http://www.gulfup.com/?VvN8Ll
معذور
http://www.gulfup.com/?aCGuHe
ضمير الحب
http://www.gulfup.com/?mFAiJT
رايد وطن
http://www.gulfup.com/?vvVP9V
شريفة اني
http://www.gulfup.com/?jhfctB
بستان الحبايب
http://www.gulfup.com/?fC4SZU
الشـُهرة
http://www.gulfup.com/?DtFEMP

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 Dhrgam AL-Iraqi
Iraqi Poet
Web: www.dhrgamaliraqi78.blogspot.com

مع تحيات 
ادارة الموقع والقناة
علي السامي

مرسلة بواسطة في ليست هناك تعليقات:
الاشتراك في: الرسائل (Atom)